aw0537_神妃密施食迴向詞集

381ལྷ་མོའི་གསང་མདོས་བསྔོ་ཚིག་བཞུགས་སོ། ། 45-6-287 ༄༅། །ལྷ་མོའི་གསང་མདོས་བསྔོ་ཚིག་བཞུགས་སོ། ། ༄༅། །ལྷ་མོའི་གསང་མདོས་བསྔོ་ཚིག་བཞུགས་སོ། །བྷྱོ། རི་རབ་ལྷུན་པོ་གླིང་བཞི་གླིང་ཕྲན་ཅན། །རིན་ཆེན་རི་བོ་དཔག་བསམ་ལྗོན་པའི་ཤིང་། །འདོད་འཇོའི་བ་དང་མ་རྨོས་ལོ་ཏོག་སྨིན། །ཉི་ཟླས་མུན་སེལ་ལྕགས་རིས་བསྐོར་བའི་ནང་། །དངོས་བཤམས་ཡིད་སྤྲུལ་ཀུན་བཟང་མཆོད་པའི་སྤྲིན། །འཕྲིན་ལས་རྣམ་བཞིའི་གཏོར་ཚོགས་ཕྱུར་བུར་སྤུངས། །བདུད་རྩི་སྨན་གྱི་རྒྱ་མཚོ་ལྦུ་འཕྲེང་འཁྲིགས། །དམར་ཆེན་རཀྟའི་རྦ་རླབས་གཡོ་བ་འདིས། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་དགྲ་བགེགས་སྒྲོལ་བའི་འཕྲིན་ལས་མཛོད། །ག་བུར་གུར་གུམ་གྱིས་བྲན་མཆོད་ཡོན་དང་། །ཆུ་དང་(༢ན)ཐང་ལས་སྐྱེས་པའི་མེ་ཏོག་བཀྲ། །སྨན་སྤོས་ཤིང་སྣ་དྲི་ཞིམ་དུད་སྤྲིན་གཏིབས། །ཉི་མ་ནོར་བུ་རྩི་འབྲུའི་སྒྲོན་མེ་སྤར། །སྨན་སྣའི་ངད་ལྡང་ཐུགས་ཀར་བྱུགས་པའི་དྲི། །བཟའ་བཅའ་ལྷ་བཤོས་རོ་བརྒྱའི་བཅུད་དང་ལྡན། །པི་ཝང་གླིང་བུ་སིལ་སྙན་རོལ་མོའི་སྒྲ། །རྫས་མདངས་ཀྱིས་བསྒྱུར་ཞི་རྒྱས་དབང་མཆོད་འདིས། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་ 45-6-288 དགྲ་བགེགས་སྒྲོལ་བའི་འཕྲིན་ལས་མཛོད། །དྲོད་རླངས་མ་ཡལ་འཐུལ་བའི་སྙིང་ཁྲག་འཕྱར། །དབང་པོ་སྣ་ལྔའི་མེ་ཏོག་འཕྲིག་ཅིང་གཡོ། །ཤ་ཆེན་དུད་པ་ཁམས་ནག་ལང་ལོང་འཐིབས། །ཚིལ་ཆེན་སྣང་གསལ་དུས་མཐའི་མེ་བཞིན་འབར། །བསད་ཁྲག་མཁྲིས་པ་གསར་པ་རྫིང་བུར་འཁྱིལ། །ཤ་རུས་རྐང་མར་སྤུངས་པའི་བཟའ་བཅས་གཏམས། །ཐོད་རྔ་རྐང་གླིང་བཤུགས་པའི་སྒྲ་དབྱངས་དང་། །འབོད་བརྡ་གཡབ་པའི་དར་ཚོན་སྣ་ལྔ་ཡིས། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་(༢བ)རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་དགྲ་བགེགས་སྒྲོལ་བའི་འཕྲིན་ལས་མཛོད། །རྟ་མཆོག་འབྲོང་གཡག་ཞོལ་མོ་འདོད་འཇོའི་བ། །ར་ལུག་བྱ་ནག་ཁྱི་ནག་ཅེ་སྤྱང་སོགས། །གནམ་ལ་འཕུར་དགུ་ས་ལ་འཛུལ་དགུ་དང་། །རི་དྭགས་མཆོང་དགུ་བགྲང་ཡས་སྲོག་ཆགས་ཚོགས། །སྲིན་པོའི་མགོ་ལྤགས་སྤྲས་པའི་རྐྱང་སེར་དྲེལ། །བེ་ཅོན་ནལ་ཐོད་འཕྲིན་ལས་བཞི་སྒྲུབ་པའི། །སྣ་ཚོགས་ཕྱག་མཚན་རྒྱན་གོས་བཞོན་པ་དང་། །མཐུན་པའི་དམ་རྫས་མ་ཚང་མེད་པ་ཡིས། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་དགྲ་བགེགས་སྒྲོལ་བའི་འཕྲིན་ལས་མཛོད། །རང་སྲུང་རྡོ་རྗེའི་གོ་ཆ་སྲ་ཞིང་བརྟན། །ཕ་རོལ་ཕྱེར་འཐག་སྣ་ཚོགས་མཚོན་ཆ་གཟིངས། ཁྲག་རྒྱུན་འཛག་པའི་མི་ལྤགས་བླ་བྲེ་བྲེས། །མགོ་རྐང་ལག་སྐྲའི་བ་དན་ཕྱོགས་བཅུར་གཡོ། །འཕྲལ་བསད་རྒྱུ་མ་རློན་པའི་ལྡ་ལྡི་ལ། །གློ་སྙིང་མཁའ་མཆིན་མཚེར་པའི་ 45-6-289 དྲ་ཕྱེད་འཕྱང་། །སྲིད་གསུམ་འཕྱོ་པའི་རླུང་ནག་གུར་ཆེན་ཕུབ། །གཤིན་རྗེའི་བཤས་ར་ལྟ་བུའི་ཞིང་ཁམས་འདིས། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་དགྲ་བགེགས་སྒྲོལ་བའི་འཕྲིན་ལས་མཛོད། །ཡིད་འཕྲོག་ལྷ་ཡི་དགའ་ཚལ་ཚར་དུ་དངར། །ནད་བརྒྱ་སེལ་བའི་སྨན་གྱི་ནགས་ཀླུང་འཁྲིགས། །རིན་ཆེན་ཁང་བཟང་རྒྱ་ཕིབས་ལྕོག་གིས་མཛེས། །ཡིད་བཞིན་ནོར་སོགས་ལྷ་མིའི་དཔལ་འབྱོར་བསྙིལ། །ནམ་མཁའ་རྒྱང་བུ་མདའ་འཕང་དར་ཚོན་འབྲུ། །ཇ་སྣ་ཤིང་འབྲས་ཤ་སྒང་རམས་སྐག་མཚལ། །བཙོད་ཞུན་སྣམ་རས་ལས་སྒོ་སྣ་ཚོགས་ཟོང་། །དཀར་གསུམ་མངར་གསུམ་བཟའ་བཅའ་ངར་མི་གླུད། །དབུས་སྐྱུ་ཁྲག་ཀོང་བགྲང་ཡས་མཐུན་རྫས་ཀྱིས། །(༣ན)སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་དགྲ་བགེགས་སྒྲོལ་བའི་འཕྲིན་ལས་མཛོད། །འཁོར་ལོ་ནོར་བུ་དབང་རྒྱལ་བཙུན་མོ་དང་། །སྔོན་པོ་གླང་ཆེན་རྟ་མཆོག་དམག་གི་དཔོན། །འོད་སྔོན་འཕྲོ་བའི་རལ་གྲི་པགས་པ་འཇམ། །དགའ་བའི་ནགས་ཚལ་ཅི་འདོད་འགྲུབ་པའི་ཁྱིམ། །གདུང་སེལ་གོས་དང་ཉོན་མོངས་བྲལ་བའི་མལ། །སྐད་ཅིག་བགྲོད་ལྷམ་ཉེ་བའི་རིན་ཆེན་བདུན། །བཀྲ་ཤིས་རྫས་རྟགས་བརྒྱད་དང་འདོད་ཡོན་ལྔ། །ནམ་མཁའ་མཛོད་ཀྱི་སྒོ་ཕྱེ་མཆོད་སྤྲིན་གྱིས། །སྲིད་གསུམ་དབང་སྒྱུར་དཔལ་ལྡན་རེ་མ་ཏཱི། །ཞི་རྒྱས་དབང་དྲག་ལས་བཞིའི་རྣམ་འགྱུར་ཅན། །རེ་ཏཱི་ནད་བདག་ 45-6-290 བཀའ་ཉན་དུས་བཞིའི་ལྷ། །གངས་ཀྱི་ཡུམ་ཆེན་མཆེད་སོགས་བོད་སྐྱོང་བསྟན། །བཅུ་གཉིས་དམ་ཅན་རྒྱ་མཚོའི་ཐུགས་དམ་བསྐང་། །སྒྲིབ་གཉིས་ནད་གདོན་ཞི་ཞིང་ཚེ་དཔལ་དང་། །ལུང་རྟོགས་རབ་རྒྱས་ཁམས་གསུམ་དབང་དུ་སྡུད། །གནོད་བྱེད་དགྲ་བགེགས་སྒྲོལ་བའི་འཕྲིན་ལས་མཛོད། །གསང་མདོས་བསྔོ་བའི་ཚིགས་སུ་བཅད་པ་ཟ་ཧོར་བནྡེས་འཕྲལ་དུ་སྦྱར་བའི་ཡི་གེ་པ་ནི་དགེ་སློང་འཇམ་དབྱངས་གྲགས་པའོ། །སརྦ་མངྒ་ལཾ།།